You are currently browsing the monthly archive for May 2008.

மீன்த்தொட்டி மீன்களை
ஆச்சர்யமாய் பார்த்துக்கொண்டிருந்த குழந்தை
உணவின்போது பரிமாறப்பட்ட மீனை
சாப்பிட மறுத்துச்சொன்னது
நெருப்பில் மீனுக்கு வலித்திருக்கும்மென்று!
அதைக் கேட்டபின் சைவமாகிவிட்ட எனக்கும்தான்.

Advertisements

யார் அதிஷ்டசாலியென நமக்கான சண்டையில்
மச்சங்கள் எண்ணிப்பார்த்துத் தீர்மானிக்க
நீ வெட்கப்பட்டு ஒத்துக்கொண்டபின்
உடல்களின் நாகரீக எல்லைகளை சற்றே தாண்டிய பின் ஏற்ப்பட்ட
உஷ்ணங்களை வியர்வை உடல்களால் தணித்து
உள் மூச்சு வாங்க…
எண்ணி முடிக்கையில்
இருவருமே அதிஷ்டசாலிகளானோம்

நிலா வர மறுத்த ஒரு மாலையில்
பேசத் தயங்கி பார்வைகள் மட்டும் பரிமாறிக்கொண்ட
நம் உறவின் தொடக்க நாள் தொடங்கி
படிக்க விரும்பாத புத்தகங்களை கடன்வாங்கிய நாட்களின் பின்
தொலைபேசிகளில் இரவு கழித்து
மச்சங்கள் எண்ணி வியர்வைகளை பரஸ்பர உடல்களில் துடைத்த நாட்கள் தொடர்ந்து
பேச்சுக்கள் அற்றுப்பிரிந்து போகும் சண்டை நாட்களில் உணர்கிறேன்
காதல் கசக்குமென்று

மணல் கடிகாரங்களில்
மணல் கொட்டித்தீர்ந்த மேல் பாகம்
மீண்டும் மணலுக்காக காத்திருத்தலைப்போல்தான்
நம் சண்டைகளின் பின் தூக்கியெறியப்படும் உன் நினைவுகளை
மீண்டும் நிரப்பக் காத்திருக்கிறேன்

தெரியாமல் என் தோள் பார்த்து தொட்டுவிட்டாய்
சிணுங்கிவிட்டு என் கவனிப்பை உறுதிபடுத்திக்கொண்டாய்
சட்டை பொத்தான் போட்டு என் மார் வருடிக்கொண்டாய்
நடக்கையில் கைகலுரசும்போதைய என் மௌனத்தை கவனித்துக்கொண்டு,
முத்தங்கள் முடித்தபின் உன் சிவந்த கண்ணில்
என் கண்களை மாறிமாறி பார்த்துக்கொண்டாய்
ஏககாலத்தில் இத்தனையும் தாண்டி நடந்துகொண்டிருக்கையில்
நொடிப்பொழுதில் விலகி
திரும்பிப்பார்க்காமல் போகிறாய்
திரும்பியிருக்கலாம்
திரும்ப விரும்பவில்லையோ என்னவோ.

என்றோ பதிந்த பிம்பத்தில்தான் மீண்டும்
தொடங்கிஇருக்கவேண்டும் உன் நினைவுகள்…
தனிமையில் கனத்த இரைச்சலாக.
காலப்போக்கில்
உன் தினந்தோர நினைவுகளில் உன்னைப்பற்றிய ஒன்றுமேயில்லை
இப்போது,
நீ இல்லாத கூனல் விழுந்த
பொழுதுகளைத் தாண்டி
கண்ணாடி பிம்பங்களில் என்
ஒருமையின் கனம் மட்டும் கூடியிருக்கிறது.

-elementgandhi@yahoo.co.in